پاکستان کے اوپننگ بلے باز صاحبزادہ فرحان نے آئی سی سی کی تازہ ترین مردوں کی ٹی20 بین الاقوامی رینکنگ میں شاندار پیش رفت کرتے ہوئے دوسری پوزیشن حاصل کر لی ہے۔ بدھ کو جاری ہونے والی نئی درجہ بندی میں انہوں نے بھارت کے ابھیشیک شرما کو پیچھے چھوڑ دیا۔
30 سالہ صاحبزادہ فرحان اس وقت 848 ریٹنگ پوائنٹس کے ساتھ دوسرے نمبر پر موجود ہیں۔ دوسری جانب ابھیشیک شرما حالیہ آئرلینڈ، انگلینڈ اور زمبابوے کے دوروں میں مسلسل کم اسکور کرنے کے باعث 819 پوائنٹس کے ساتھ تیسرے نمبر پر چلے گئے۔
بھارت کے وکٹ کیپر بلے باز ایشان کشن بدستور 910 ریٹنگ پوائنٹس کے ساتھ پہلی پوزیشن پر برقرار ہیں۔ ابتدائی پانچ بلے بازوں کی فہرست میں صاحبزادہ فرحان اور ابھیشیک شرما کی پوزیشن کے تبادلے کے علاوہ کوئی نمایاں تبدیلی سامنے نہیں آئی۔
بھارت کے تلک ورما نے دو درجے ترقی کرتے ہوئے چھٹی پوزیشن حاصل کر لی ہے۔ انگلینڈ کے ہیری بروک اور جوس بٹلر ایک، ایک درجہ تنزلی کے بعد نیچے آگئے، جبکہ جنوبی افریقہ کے ڈیوالڈ بریوس ایک درجہ بہتری کے ساتھ پہلی مرتبہ ٹاپ ٹین میں شامل ہو کر دسویں نمبر پر پہنچ گئے۔
تازہ ترین رینکنگ میں سب سے بڑی ترقی بھارت کے نوجوان بلے باز ویبھوو سوریہ ونشی نے کی۔ صرف 15 سالہ کھلاڑی نے زمبابوے کے دورے میں شاندار کارکردگی پر سیریز کے بہترین کھلاڑی کا اعزاز حاصل کیا، جس کے بعد وہ 230 درجے ترقی کرتے ہوئے 536 پوائنٹس کے ساتھ 48ویں نمبر پر آگئے۔
ٹی20 بین الاقوامی باؤلرز کی رینکنگ میں پاکستان کے اسپنر ابرار احمد نے 736 ریٹنگ پوائنٹس کے ساتھ دوسری پوزیشن برقرار رکھی۔ افغانستان کے راشد خان بدستور پہلے نمبر پر موجود ہیں، جبکہ انگلینڈ کے عادل رشید تیسرے نمبر پر ہیں۔
پاکستان کے محمد نواز نے 658 پوائنٹس کے ساتھ دسویں پوزیشن برقرار رکھی، جبکہ فاسٹ باؤلر سلمان معراج ایک درجہ ترقی کر کے پندرھویں نمبر پر پہنچ گئے۔ بھارت کے ورون چکرورتی تین درجے تنزلی کے بعد ٹاپ ٹین سے باہر ہوگئے۔
آسٹریلیا کے فاسٹ باؤلر نیتھن ایلس بھی ایک درجہ ترقی پا کر 675 ریٹنگ پوائنٹس کے ساتھ پہلی پانچ پوزیشنوں میں شامل ہونے میں کامیاب رہے۔
مزید پڑھیں: بابر اعظم نے ویسٹ انڈیز کے خلاف شکست کی اصل وجہ بیان کر دی
