لاہور: پاکستان سپر لیگ (پی ایس ایل) کی انتظامیہ نے لیگ کی تمام آٹھ فرنچائزز کے مالکان کے ساتھ ایک تفصیلی جائزہ اجلاس منعقد کیا، جس میں سیزن 11 کی کامیاب میزبانی کا جائزہ لینے کے ساتھ آئندہ ایڈیشن کی تیاریوں پر بھی غور کیا گیا۔
اجلاس کی صدارت چیئرمین پاکستان کرکٹ بورڈ (PCB) محسن نقوی نے کی۔ اجلاس میں پی ایس ایل کے چیف ایگزیکٹو آفیسر سلمان نصیر، پی سی بی کے چیف فنانشل آفیسر جاوید مرتضیٰ، ڈائریکٹر پی ایس ایل عثمان واہلہ، سینئر منیجر پی ایس ایل حجاب زاہد، منیجر آپریشنز عثمان تسلیم سمیت دیگر حکام نے شرکت کی۔
اجلاس کے دوران سیزن 11 کی نمایاں کامیابیوں کا تفصیلی جائزہ لیا گیا۔ شرکا نے نشریاتی نظام میں متعارف کرائی گئی نئی جدتوں، شائقین کی دلچسپی بڑھانے کے اقدامات، 44 میچوں میں کرکٹ کے معیار، سوشل میڈیا، اسٹریمنگ پلیٹ فارمز اور ٹیلی ویژن پر حاصل ہونے والی ریکارڈ ناظرین کی تعداد پر بھی تبادلہ خیال کیا۔
انتظامیہ نے اس بات سے بھی اتفاق کیا کہ ان تمام کامیابیوں سے متعلق مزید تفصیلات مناسب وقت پر جاری کی جائیں گی۔
اجلاس میں لیگ کے آف سیزن اور پری سیزن کے دوران مختلف خصوصی سرگرمیوں کے انعقاد پر بھی غور کیا گیا، جن کا مقصد سال بھر شائقین کو پی ایس ایل سے جوڑے رکھنا ہے۔
تمام متعلقہ فریقین نے پی ایس ایل 12 کے لیے مجوزہ ونڈو اور شیڈول پر بھی مشاورت کی۔ توقع ظاہر کی گئی کہ آئندہ سیزن کی مکمل تفصیلات اگست کے آخر میں ہونے والے پی ایس ایل گورننگ کونسل کے اجلاس کے بعد سامنے لائی جائیں گی۔
جائزہ اجلاس میں لیگ کی مسلسل ترقی کو بھی سراہا گیا۔ شرکا نے دو نئی فرنچائزز کے اضافے، تین فرنچائزز کی فروخت، غیر معمولی حالات میں صرف دو مقامات پر سیزن 11 کے کامیاب انعقاد اور مسلسل دوسرے سال نئے شیڈول کے تحت لیگ کے انعقاد کو اہم پیش رفت قرار دیا۔
اجلاس میں یہ فیصلہ بھی کیا گیا کہ پی ایس ایل اور تمام فرنچائزز کے اشتراک سے ایک خصوصی مرچنڈائز پلیٹ فارم متعارف کرایا جائے گا، جہاں پاکستان سمیت دنیا بھر کے شائقین لیگ اور تمام آٹھ ٹیموں کی سرکاری مصنوعات خرید سکیں گے۔
اس کے علاوہ آئندہ سیزن کی تیاریوں کے سلسلے میں مختلف ورکشاپس منعقد کی جائیں گی، جن میں شیڈول کو حتمی شکل دینے، کھلاڑیوں کی برقرار رکھنے کی فہرست، براہِ راست معاہدوں اور کھیل سے متعلق قواعد کا جائزہ لیا جائے گا۔
مزید پڑھیں: آئی سی سی نے ورلڈ کپ 2027 کے 12 میزبان وینیوز کی تصدیق کر دی
