لاہور: پاکستان کی محدود اوورز کرکٹ ٹیم کے ہیڈ کوچ مائیک ہیسن نے نیشنل چیمپئنز کپ کے آغاز سے قبل اعتماد کا اظہار کرتے ہوئے کہا ہے کہ یہ ٹورنامنٹ ICC ورلڈ کپ 2027 کی تیاریوں میں اہم کردار ادا کرے گا۔
نیشنل چیمپئنز کپ کا آغاز 18 اگست سے ملتان کرکٹ اسٹیڈیم میں ہوگا، جہاں تمام سات میچز ڈے اینڈ نائٹ کھیلے جائیں گے۔
50 اوورز پر مشتمل اس لسٹ اے ٹورنامنٹ میں چار ٹیمیں، پاکستان گرینز، پاکستان وائٹس، پاکستان بلیوز اور پاکستان گولڈ شرکت کریں گی۔ اسی ایونٹ کے ساتھ پاکستان کے ڈومیسٹک سیزن 2026-27 کا باقاعدہ آغاز بھی ہوگا۔
ٹورنامنٹ سنگل لیگ راؤنڈ رابن فارمیٹ کے تحت کھیلا جائے گا، جبکہ پوائنٹس ٹیبل پر سرفہرست رہنے والی دو ٹیمیں فائنل کے لیے کوالیفائی کریں گی۔
آئی سی سی نے ورلڈ کپ 2027 کے 12 میزبان وینیوز کی تصدیق کر دی
میڈیا سے گفتگو کرتے ہوئے مائیک ہیسن نے بتایا کہ ڈومیسٹک سیزن کا آغاز 50 اوورز کے لسٹ اے ٹورنامنٹ سے کرنے کا فیصلہ مستقبل کی منصوبہ بندی کو مدنظر رکھتے ہوئے کیا گیا ہے۔
انہوں نے کہا، "ہماری تمام توجہ ورلڈ کپ کی تیاری پر ہے، اسی مقصد کے لیے چار ٹیموں پر مشتمل یہ ٹورنامنٹ ترتیب دیا گیا ہے۔”
ہیڈ کوچ نے اس یقین کا اظہار کیا کہ یہ ایونٹ انتہائی مسابقتی ہوگا اور تمام کھلاڑیوں کو اپنی صلاحیتوں کے اظہار کا بہترین موقع فراہم کرے گا۔
انہوں نے کہا، "یہ ایک اعلیٰ معیار کا ٹورنامنٹ ہوگا۔ شائقین بہترین کرکٹ دیکھیں گے جبکہ ہر کھلاڑی کو اپنی کارکردگی دکھانے کا بھرپور موقع ملے گا۔”
مائیک ہیسن کے مطابق ٹیم مینجمنٹ کی کوشش ہے کہ کھلاڑیوں کو زیادہ سے زیادہ لسٹ اے میچز کھیلنے کا موقع دیا جائے تاکہ وہ آئندہ بین الاقوامی مقابلوں کے لیے بہتر انداز میں تیار ہو سکیں۔
انہوں نے مزید کہا، "ہم چاہتے ہیں کہ ہمارے کھلاڑی زیادہ سے زیادہ لسٹ اے میچز کھیلیں۔ ہماری کوشش ہے کہ انہیں بھرپور مواقع فراہم کیے جائیں اور اسی حکمت عملی کے تحت منصوبہ بندی کی جا رہی ہے۔”
ICC ورلڈ کپ 2027 کے حوالے سے گفتگو کرتے ہوئے مائیک ہیسن نے کہا کہ پاکستان کی ٹیم ماضی میں بڑے ٹورنامنٹس میں اچھی کارکردگی کا مظاہرہ کرتی رہی ہے اور انہیں امید ہے کہ آئندہ بھی ٹیم ایک مضبوط مہم پیش کرے گی۔
انہوں نے کہا، "سلیکٹرز نے چاروں ٹیموں میں مضبوط امتزاج تشکیل دیا ہے اور مجھے یقین ہے کہ اس ٹورنامنٹ سے کئی نمایاں کھلاڑی سامنے آئیں گے۔”
مزید پڑھیں: پی ایس ایل 11 کا کامیاب جائزہ، سیزن 12 کی تیاریوں پر اہم مشاورت
