گیانا: گلوبل سپر لیگ (GSL) 2026 میں لاہور قلندرز نے اپنے اسکواڈ میں اہم تبدیلی کرتے ہوئے پاکستان کے مایہ ناز بلے باز عبداللہ شفیق کی جگہ بنگلہ دیش کے آل راؤنڈر شمیم حسین کو باقی ماندہ ٹورنامنٹ کے لیے ٹیم میں شامل کر لیا ہے۔
فرنچائز نے سماجی رابطے کی ویب سائٹ پر اس تبدیلی کا اعلان کرتے ہوئے بتایا کہ عبداللہ شفیق قومی ذمہ داری نبھانے کے لیے پاکستان واپس روانہ ہوں گے، جہاں وہ ویسٹ انڈیز اور انگلینڈ کے خلاف ٹیسٹ سیریز میں قومی ٹیم کا حصہ ہوں گے۔
دائیں ہاتھ کے بلے باز عبداللہ شفیق کو زخمی عبداللہ فضل کی جگہ پاکستان کے ٹیسٹ اسکواڈ میں شامل کیا گیا ہے۔ وہ آخری مرتبہ اکتوبر 2025 میں قومی ٹیم کی نمائندگی کرتے ہوئے میدان میں اترے تھے۔
لاہور قلندرز نے اپنے پیغام میں کہا کہ عبداللہ شفیق قومی ٹیم میں شمولیت اختیار کر رہے ہیں اور ان کے لیے نیک تمناؤں کا اظہار کیا گیا ہے، جبکہ بنگلہ دیشی آل راؤنڈر شمیم حسین اب گلوبل سپر لیگ کے بقیہ مقابلوں میں لاہور قلندرز کی نمائندگی کریں گے۔
شمیم حسین کے لیے یہ کسی بھی بین الاقوامی فرنچائز لیگ میں پہلی شرکت ہوگی۔ اس سے قبل وہ اپنی تمام ٹی ٹوئنٹی کرکٹ بنگلہ دیش پریمیئر لیگ (BPL) میں کھیلتے رہے ہیں۔
بنگلہ دیش کی جانب سے شمیم حسین اب تک 52 ٹی ٹوئنٹی بین الاقوامی میچ کھیل چکے ہیں، جن میں انہوں نے 621 رنز 122.72 کے اسٹرائیک ریٹ سے بنائے ہیں۔ ان کی اننگز میں ایک نصف سنچری بھی شامل ہے۔
اگر بنگلہ دیش پریمیئر لیگ کی کارکردگی پر نظر ڈالی جائے تو شمیم حسین نے پانچ سیزنز کے دوران 61 میچز میں 1,040 رنز اسکور کیے۔ اس عرصے میں ان کا اسٹرائیک ریٹ 141.68 رہا، جبکہ وہ چھ نصف سنچریاں بھی اپنے نام کر چکے ہیں۔
گلوبل سپر لیگ 2026 کے پوائنٹس ٹیبل میں لاہور قلندرز اس وقت دوسرے نمبر پر موجود ہیں۔ ٹیم نے اب تک تین میچز میں دو کامیابیاں حاصل کی ہیں، جبکہ واحد شکست گیانا ایمیزون واریئرز کے خلاف ہوئی تھی۔
مزید پڑھیں: پی سی بی نے نیشنل چیمپئنز کپ 2026 کے اسکواڈز اور شیڈول کا اعلان کر دیا
